13.06.2025
Muqobil g‘amxo‘rlik tizimida psixosotsial qo‘llab-quvvatlashni kuchaytirish: davra suhbati
Toshkent, 2025-yil 13-iyun – SOS O‘zbekiston Bolalar Mahallalari Uyushmasi hamda UNICEFning O‘zbekistondagi vakolatxonasi hamkorligida muqobil g‘amxo‘rlikda bo‘lgan bolalarni psixosotsial qo‘llab-quvvatlash, shuningdek, ularni biologik oilalaridan ajralib qolishining oldini olish masalalariga bag‘ishlangan davra suhbati bo‘lib o‘tdi. 
Tadbirda davlat idoralari, xalqaro va mahalliy tashkilotlar vakillari, soha mutaxassislari, asrab oluvchi ota-onalar hamda muqobil parvarish tizimida ulg‘aygan yoshlar ishtirok etdi.
Asosiy maqsad – psixologik travma bilan ishlash yondashuviga asoslangan holda, oilaviy g‘amxo‘rliksiz qolgan yoki xavf ostida bo‘lgan bolalarni ruhiy va psixososial jihatdan samarali qo‘llab-quvvatlash usullarini aniqlash hamda turli sohalararo hamkorlikni kuchaytirish bo‘ldi.
Ishtirokchilar travmaga sezgir va barqaror yondashuvlarni amaliyotga tatbiq etish, bolalar va oilalar bilan ishlovchi mutaxassislarni tizimli tarzda qo‘llab-quvvatlash zarurligini alohida ta’kidladilar. Sifatli psixososial xizmatlarga keng kirish imkoniyati – muqobil g‘amxo‘rlik tizimini isloh qilishda bolalarning huquqlarini samarali himoya qilishning muhim omili sifatida qayd etildi.
Tadbirni SOS O‘zbekiston Bolalar Mahallalari Uyushmasi direktori Gulnoza Abidova hamda UNICEFning O‘zbekistondagi vakolatxonasi rahbari Rehina Mariya Kastijjo ochib berdi. Xalqaro ekspert Lyubosh Tibenskiy psixososial qo‘llab-quvvatlashning asosiy tamoyillarini taqdim etdi, UNICEF maslahatchisi Diana Isayeva esa mamlakatda ruhiy salomatlik va ijtimoiy qo‘llab-quvvatlash bo‘yicha olib borilayotgan amaliyotlar bilan bo‘lishdi.
Panel muhokamalari va guruh ishlari davomida ishtirokchilar internatsion parvarishdan voz kechish, oilaviy g‘amxo‘rlik shakllarini kengaytirish, erta aralashuv xizmatlarini rivojlantirish hamda psixososial yordamni ijtimoiy himoya strategiyalariga integratsiya qilish yo‘llarini muhokama qildilar. Tadbirda ishtirok etgan asrab oluvchi ota-onalar va muqobil parvarishda ulg‘aygan yoshlarning shaxsiy tajribasi munozaraga amaliy ahamiyat bag‘ishladi.
Mazkur davra suhbati bolalar farovonligida psixosotsial qo‘llab-quvvatlashning o‘rni tobora ortib borayotganini yana bir bor tasdiqladi va sohalararo hamkorlikni mustahkamlashga yana bir qadam sifatida xizmat qiladi.
