24.05.2022
Seminar «Aholini ijtimoiy himoyaga muhtoj oilalarini va bolalarni himoya qilish va ularga hamrohlik qilish usullari: SOS O‘zbekiston bolalar mahallalari tajribasi misolida»
2022-yil 24-may kuni, Shodlik Palace mehmonxonasida, SOS O‘zbekiston bolalar mahallalari Uyushmasining Toshkent shahar filiali tomonidan tashkil qilingan «Aholini ijtimoiy himoyaga muhtoj oilalarini va bolalarni himoya qilish va ularga hamrohlik qilish usullari: SOS O‘zbekiston bolalar mahallalari tajribasi misolida» seminari bo‘lib o‘tdi.
Tadbirda Toshkent shahar xokimligi bolalarni himoya qilish masalalari kotibiyati mudiri va bosh mutaxassisi, tuman sho‘’balari mudirlari va bosh mutaxassislari, Toshkent shahar hokimligi sog‘likni saqlash bosh boshqarmasi “Go‘daklar uyi” direktori, Toshkent shahar xalq ta’limi bosh boshqarmasi vakili hamda tashkilotning hamkor mahallalarining vakillari ishtirok etdilar.
Tadbirni SOS O‘zbekiston bolalar mahallalari Uyushmasining Toshkent shahar filiali direktori – D.S.Muxamedraximova ochib berdi. U o‘z so‘zida, bugungi kunda, etim bolalar va ota-ona qaramog‘idan mahrum bo‘lgan bolalarni joylashtirishning muqobil, oilaviy shakllarini tanlash, oila institutini mustahkamlash hamda ijtimoiy etimlikning oldini olish tizimini takomillashtirish dolzarb mavzu ekanligini ta’kidlab o‘tdi. So‘zini davom ettirar ekan, D.Muxamedraximova ushbu masalada Geytkiping tizimi muhim o‘rin tutishini va bu bo‘yicha ish olib borishda ijtimoiy hamkorlar bilan tajriba almashish va amaliyotni Toshkent shaxrida joriy etish tadbirning maqsadi ekanligini aytib o‘tdi.
Tadbirda so‘zga chiqganlar, geytkiping jarayoni, ya’ni bolalarni o‘z oilalaridan ajratilishining oldini olish imkonini beruvchi, bolani mexribonlik uyiga joylashtirishdan avval oilaga yordam ko‘rsatish yoki bolani yaqin qarindoshlarining qaramog‘iga berish imkoniyatlarini qo‘rib chiqilishini kafolatlovchi tizimni amalda qo‘llanilishini yo‘lga qo‘yish masalasini muhokama qildilar va ushbu sohada olib borilayotgan ishlar yuzasidan fikr almashdilar.
Tadbir ishtirokchilari, SOS Bolalar mahallalari tajribasini o‘rganishdi va shu bilan bir qatorda o‘zaro hamkorlikni kuchaytirish borasidagi ishlarni belgilab olishdi.
